PSC wala nagkuwang suporta ngadto ni Diaz

CEBU, Philippines — Usa ka adlaw human sa kontrobersiyal nga pamahayag ni Olympian Hidilyn Diaz nga kulang siya og pinansiyal nga suporta gikan sa kagamhanan, ang Philippine Sports Commission (PSC) miingon nga naglibog sila  kun asa sila nagkulang nga tabang   sa maong atleta.

Si PSC chairman William Ramirez miingon nga wala gyud pasagdi sa kagamhanan si Diaz ug ubang atletang Pinoy nga naningkamot sa ilang preparasyon alang sa 2020 Tokyo Olympics.

Gawas sa PSC, si Ramirez miingon nga dako usab og tabang ang gihatag sa Air Force ngadto ni Diaz, kinsa usa ka enlisted personnel.

Gidetalye ni Ramirez nga ang PSC migasto na og P4.5 million sa training ni Diaz didto sa China. Sila sab ang nagbayad sa suweldo ug pagkaon ni Kaiwen Gao, ang coach ni Diaz. 

Si Diaz midaog og gold medal sa women's 53kg weightlifting sa Asian Games didto sa Indonesia niadtong Agosto sa miaging tuig.