SMB, Magnolia sugod na sa ilang kampanya
CEBU, Philippines – Ang mga finalists sa miaging All-Filipino Cup San Miguel Beermen ug Magnolia Hotshots mosugod na sa ilang kampanya sa Commissioner's Cup karon didto sa Smart Araneta Coliseum.
Ang Beermen makigsangka sa NorthPort Batang Pier sa alas-6:45 sa gabii human sa duwa sa Magnolia ug Alaska Aces nga sugdan sa alas-4:30 sa hapon.
Human gipakita nga sila ang labing dominanteng koponan sa All-Filipino Cup, si Beermen coach Leo Austria mitug-an nga tuyo nila nga makompleto ang talagsaong sweep sa tulo ka conferences title sa season.
Aron matuman ang ilang damgo, gikuha pagbalik sa Beermen ang kanhi best import nga si Charles Rhodes. Misaad si Rhodes nga ihatod niya pagbalik ang Beermen sa kampiyonato sama sa iyang gibuhat niadtong tuig 2017.
Hinuon, masuwayan dayon ang San Miguel tungod kay sangkaon nila ang milig-on nga NorthPort nga bidahan ni Gilas Pilipinas scorer Stanley Pringle uban ang import nga si Prince Ibeh.
Ang NorthPort gustong mamawi human giputol ang ilang tulo ka sunod-sunod nga daog sa Barangay Ginebra Kings niadtong Domingo.
- Latest
