ABAP matitikas na boxers ang isasabak sa Manila SEA Games
MANILA, Philippines — Mananatili ang national boxing team na isa sa mga maaasahan na magbibigay ng gintong medalya para sa Team Philippines sa darating na 30th Southeast Asian Games na gaganapin dito sa Pilipinas sa Nobyembre 30 hanggang Disyembre 11.
“Everything is going well. Maganda ang training ng mga boxers natin at talagang pursigido sila na manalo ng golds sa SEA Games,” sabi ni Alliance of Boxing Association of the Philippines (ABAP) secretary-general Ed Picson sa TOPS Forum.
Ayon pa kay Picson, may kabuuang 13 gintong medalya, walo sa lalaki at lima sa babae ang paglalabanan sa darating na biennial meet kung saan humakot ang Pilipinas ng walong ginto, apat na silvers at dalawang bronze medals noong 2005 SEAG na idinaos din sa bansa.
Sinabi pa ni Picson, bukod sa Thailand, lumakas na rin ang Vietnam at Indonesia sa larangan ng boxing kaya kailangan talaga ang maigting na paghahanda ng national team.
Ang mga magagaling lamang at ‘yong may pag-asa sa gold ang makakasama sa national team na mabubuo sa Setyembre o sa Oktubre matapos ang ilang serye ng qualifying competitions.
Inaasahan na kabilang sa koponan ang mga malalakas na boksingero na sina Felix Marcial at Josie Gabuco matapos mag-uwi ng ginto mula sa India Open. Tiyak ding kasama si Carlo Paalam, ang bronze medalist sa India Open.
- Latest
