Elite ika-3 biktima ang Dyip
MANILA, Philippines — Tila ayaw magpaawat ng Blackwater.
Dumiretso ang Elite sa kanilang ikatlong sunod na arangkada matapos talunin ang Columbian, 118-110 para solohin ang liderato ng 2019 PBA Commissioner’s Cup kahapon sa Smart Araneta Coliseum.
Nagmula ang Blackwater sa dalawang overtime wins laban sa Meralco, 94-91 at nagdedepensang Barangay Ginebra, 108-107.
Nalasap naman ng Columbian ang kanilang ikatlong dikit na kamalasan.
“It’s a great system. We’re just locked in and as long as we got the win, that’s the most important thing,” sabi ni No. 2 overall pick Ray Ray Parks, tumipa ng 23 points, tampok dito ang 4-of-9 shooting sa three-point range, bukod pa ang 5 rebounds, 5 assists at 2 steals.
Humakot naman si import Alex Stepheson ng 26 points, 21 boards, 7 blocks at 3 assists.
Kinuha ng Dyip ang 39-31 abante mula sa three-point shot ni import Kyle Barone sa kaagahan ng second period bago naghulog ang Elite ng 13-4 bomba tampok ang tatlong sunod ns triples ni Allein Maliksi para makatabla sa 44-44.
Inagaw ng Blackwater ang bentahe sa halftime, 57-54 patungo sa pagtatala ng 10-point lead, 86-76 kontra sa Columbian galing sa tres ni Roi Sumang sa huling 27.3 segundo ng third quarter.
Itinayo ng Elite ang pinakamalaki nilang kalamangan sa 92-79 sa pagbubukas ng final canto galing sa tres ni Maliksi.
Nagpakawala naman ang Dyip ng 13-2 atake nang ipahinga ni coach Aris Dimaunahan si Stepheson para idikit ang laro sa 92-94 sa 8:11 minuto nito.
Ang triple ni Maliksi at two-handed slam ng nagbabalik na si Stepheson ang naglayong muli sa Blackwater sa 99-92 sa huling 7:20 minuto ng laro.
- Latest
