Jokic naghatag dakong problema sa Gilas Pilipinas sa World Cup
CEBU, Philippines — Nagkakiyuot ang kahigayonan sa Gilas Pilipinas nga modaog batok sa powerhouse Serbia human gipahibalo ni Denver Nuggets superstar Nikola Jokic nga moduwa siya sa FIBA World Cup sa Agosto didto sa China.
Ang Serbia, usa sa tulo ka mga koponan nga ikasangka sa Gilas. Uban sa Serbia ug Gilas sa group stage ang Italy ug Angola.
Si Jokic, kinsa giisip nga labing maayo nga sentro karon sa kalibotan, mi-average og 25.1 points, 13.2 rebounds ug 8.4 assists karon nga season. Dako iyang natampo sa pagsulod sa Nuggets sa Western Conference semifinals sa wala pa sila matagak sa Portland Trail Blazers sa kulbahinam nga Game-7.
Si Jokic, usa sa mga kandidato alang sa MVP race sa NBA, nagkanayon nga kontento ra siya sa resulta sa kampanya sa Nuggets tungod sa dako nilang kalamboan, apan gusto siya nga makabawi pinaagi sa pagsakmit og medalya sa World Cup.
Naproblema karon ang Gilas kun kinsa nilang Andray Blatche, JuneMar Fajardo ug Japeth Aguilar ang pabantayon ni Jokic.
- Latest
