Espeletian Sagoysoy League 2019 mosikad na
CEBU, Philippines – Human sa usa ka dekada, ang mga hingkod ug kabatan-onan sa Espeleta mibanhaw sa kalihukan sa paugnat sa kusog pinaagi sa pagpahigayon og Inter-color basketball tournament nga mosikad na karong adlawa diha sa ilang hardcourt.
Pagaulohan og "Espeletian Sagoysoy League 2019', ang liga salmotan og walo ka teams. Kini mao ang White Tuba, Violet Roda, Red Dato, Pink Power, Black Grande, Blue Rugrats Blade, Green Aparador ug Yellow Paos.
Moduwa sila ubos sa single round robin format sa elimination diin ang top 4 teams moabante sa crossover semifinals. Ang mga modaog sa semis maoy magsangka sa kampiyonato, samtang ang mga pildero mag-ilog na lang alang sa ikatulo nga dapit.
Sa pasiunang duwa karong adlawa, ang Yellow moharong sa Pink nga gikatakda sa alas-6 sa gabii ug sundan dayon sa sangka tali sa Red ug Black sa alas-7:30.
Ang liga nga ubos sa superbisyon ni committee chairman Pepoy Otero uban nilang Entos Enicuela, Tiny Atienza, Estong Alagbay, Jiji Navarez ug Bossing Padilla, usa sa mga kalihukan alang sa tinuig nga kapistahan sa mahal nga patron sa Espeleta, Pages of Saint Anthony karong Hunyo 13.
- Latest
