Carmen kampiyon sa Durano Cup

CEBU, Philippines – Human sa usa ka dekada nga paabot, nakampiyon na gyud ang Carmen sa 9th Cong. Red Durano Cup Under 18 Basketball Tournament human ilang gibuntog ang San Francisco, 65-48  niadtong weekend didto sa Danao City Civic Center.

Ang Amazing Carmen alkansi og kuwatro puntos human sa unang kuwarter, 9-13, apan milusad og mainit nga 17-4 rally aron pagposte og 32-23 nga bentaha atol sa halfime luyo sa paningkamot  ilang John Fitz Banzon, Kenneth Watin ug Axle Pasaol. 

Nakasikit ang San Fran, 31-35, apan si Watin miposa og tulo ka tres ug si Stephen Bejoc midugang og usa ka 3-pointer sa 14-5 run nga nakapainat og balik sa labaw sa Carmen ngadto sa 50-36 human sa tulo ka kuwarter.

Human mirehistro sa kinadak-an nilang labaw nga 20 puntos, 65-45  wala pa paginhawaa pa sa Carmen ang San Fran sa nahibiling bahin sa duwa.

Si Banzon mihipos og 24 puntos, samtang si Watin miamot og 15 puntos sa Carmen nga mibulsa og P50,000.

Si Rovit James Alburo lang ang naka-double figures alang sa San Fran uban ang 16 puntos. Miuli sila bitbit ang P30,000 nga ganti. 

Sa engkuwentro alang sa ikatulong dapit, ang Danao mipakaging sa Compostela, 95-47 aron pagdawat og P20,000.

Si Banzon nga maoy  MVP maoy nangu  sa Mythical Five uban sa iyang teammates nga sila si Watin ug Eddie Jayson, Alburo (San Fran) ug Benedict Oliver sa Danao.