Pacquiao biya sa tapad, apan masaligon batok Thurman

CEBU, Philippines — Biya man tuod siya sa tapad, apan si Manny Pacquiao masaligon sa iyang tsansa batok ni Keith Thurman sa gikahinaman nilang WBA welterweight championship bout karong Hunyo 19 didto sa Las Vegas.

Samtang  sa pagsulat ning maong balita, si Thurman maoy inilog ug -135 nga paborito, samtang si Pacquiao +115 nga underdog. Kini nagpasabot nga kun ikaw mopusta og $135 ni Thurman modaog ka lamang og $100, samtang ang $100 nga pusta kang Pacquiao modaog og $115.

Apan wala kini panumbalinga ni Pacquiao kay nakaagi  na man siya sa maong klase sa sitwasyon.

Matud pa ni Pacquiao nga makapadasig hinuon kini kaniya nga maningkamot og maayo aron pamatud-an ang iyang katakus sama sa iyang gibuhat ni Oscar De la Hoya usa ka dekada na ang milabay.

Kahinumduman, sa ilang sangka niadtong 2008, si Pacquiao biya kaayo batok ni De la Hoya nga usa sa mga naghari sa welterweight division niadtong panahona.

Apan iyang gitay-og ang kalibotan sa boksing human niya kulataha si De la Hoya dayon na ngadto sa pagkulit og brutal nga kadaogan sa ikawalong hugna nga maoy nakaparetiro sa hingpit sa gitamod nga Golden Boy.

Karon nga biya na sab siya, si Pacquiao nagkanayon nga himuon kini niyang motibasyon sa iyang tinguha nga si Thurman pakgangon.

Ang 40-anyos nga si Pacquiao maoy kasamtangang WBA welterweight champion, samtang si Thurman maoy WBA 'Super' champion ug makita gyud ang katag kun kinsa kanila maoy hawod sa maong dibisyon.