Harold's Hotel nakaipsot sa EJ & Ejean sa FYA 23

CEBU, Philippines — Mikulit og 'triple-double' si McLain 'The Captain' Alkuino aron pangulohan ang Harold's Hotel nga makaipsot batok sa EJ & Ejean, 106-104 sa FYA Basketball Tournament Season 23 Yoyi's Pastries & Desserts Cup 2019 niadtong Domingo didto sa Atillo gym sa Labangon, Cebu City.

Ang best player nga si Alkuino mikadlit og 20 puntos uban ang 11 ka rebounds ug 12 ka assists sa Harold's Hotel nga nagtangag na  karon  og 3-1 nga baraha ug nakigsawo sa ikaduhang dapit sa standing uban sa AVTES.

Gumikan niini, si Alkuino maoy napiling best player of the game.

Gibiyaan og otso puntos ang Harold's Hotel ni Arnel Trinidad, 16-24 sa first period, apan ila kining gikalingawan og kitkit hinungdan nga nakasikit sila, 42-46 sa halftime.

Human magtabla, 94-all sa third quarter, ang Harold's Hotel maampingon na sa ilang duwa ug ang tira ni Alkuino maoy nagselyo sa kadaogan.

Nakatampo sab og daog sila si Jade Ursal, Ava Flores, Bernard Pepito, Jayson Celestial ug Ryan Dacayana nga parehong mirehistro og double digits.

Ang EJ & Ejean nga  gisuportahan ni Baeng Medalle gipangulohan ni Derick Tabares nga mibugha og 28 puntos, gisundan ni Dandan Bocado sa iyang 27 puntos. Sila si Kyle Masongsong ug Boki Teves nagkumbinar og 31 puntos sa EJ & Ejean nga usa pa'y daog sa lima ka duwa.

Sa laing aksiyon, ang Island Hot Wings nakaipsot sab batok sa defending champion Yoyi's Pastries & Desserts, 88-85.

Si Ranel 'The Tank' Patalita mao sab ang nangu sa Island Hot Wings nga mitala og 26 puntos, milangkat og siyam ka rebounds ug siyam sab ka assists nga igo na kaayo alang kaniya aron ilhong best player of the game.

Miagi pa hinuon og overtime ang Island Hot Wings una nila mataak ang tungason nga kadaogan.

Laing naka-double digits sa Island Hot Wings   mao sila si Justine Urot nga mihirit og 24 puntos ug Daniel Enriquez nga midiga og 17 puntos.

Ang Island Hot Wings ni Junrey Arreglo, labaw og 10 puntos sa first quarter. Nahimong kulbahinam ang duwa dihang nailog sa Yoyi's ang labaw, 59-56 human sa tulo ka kuwarter.

Misamot ka kulbahinam ang duwa dihang nagsinukliay og mga puntos ang duha ka kampo nga miresulta ngadto sa overtime human magtabla human sa regulasyon, 76-76.

Padayon nga nagbinayloay og mga puntos ang duha sa dugang singko minutos, apan ang Island Hot Wings maoy gitugahan sa maong daog.

Ang team manager nga si Ahlmark Albarracin maoy nangu sa Yoyi's Pastries sa iyang 26 puntos, gisundan ni Jao Rabadon nga adunay 23 puntos, samtang si Reyboy Caballes miambit og 18 puntos.

Ang Island Hot Wings padayong nagsolo sa liderato sa ilang 5-0 nga baraha, samtang ang Yoyi's Pastries adunay 1-4 win-loss record.

Puntos matag usa

Unang duwa:

HAROLD's Hotel (106) – Alkuino 20, Ursal 19, Flores 17, Pepito 15, Celestial 12, R. Dacayana 11, Parba 8, Aranado 2, Villacastin 2.

EJ & Ejean (104) – Tabares 28, Bocado 17, K. Masongsong 17, Teves 14, J. Tabares 8, Santillan 6, O. Masongsong 4.

Ikaduhang duwa:

ISLAND Hot Wings (88) – Patalita 26, Urot 24, D. Enriquez 17, J. Flores 8, Laud 6, E. Noquillo 5, A. Navarro 2.

YOYI's Pastries  & Desserts (85) – Albarracin 26, Rabadon 23,  Caballes 18,  B. Aglipa 7, Hanginon 6, Martinez 3, Salvador 2. (BANAT NEWS)