Raptors buhi pa
CEBU, Philippines — Nakaginhawa pa ang Toronto Raptors human makabawos sa Milwaukee Bucks, 118-112 sa Game-3 sa NBA Eastern Conference Finals kagahapon didto sa Scotiabank Arena sa Toronto, Canada.
Dili hinuon sayon ang dalan nga gisubay sa Raptors kay miagi pa man kini og duwa ka overtime sa wala pa maangkon ang kutas nga kadaogan.
Si Kawhi Leonard mi-iskor og otso sa iyang 36 puntos sa ikaduhang overtime aron pangulohan ang Raptors. Ang Raptors nga misukarap sa nag-unang duha ka duwa sa serye, tataw nga nabuhian og balik sa ilang dugo bisan tuod og alkansi pa gihapon sila sa baraha nga 2-1. Mahimo hinuon nilang tablahon ang serye sa Game-4 karong Miyerkules didto man gihapon sa ilang balwarti duwaon.
Si Pascal Siakam miamot og 25 puntos, samtang si Marc Gasol miamot og 16 puntos alang sa Raptors nga diriyot mikolapso human miabante og 11 puntos sa sayong bahin sa duwa.
"We just played a lot tougher," matud pa ni Raptors coach Nick Nurse. "We were up guarding, we were physical. We were ready to play tonight."
Wala kaugpo ang finalist pagka-MVP nga si Giannis Antetokounmpo nga mihipos lamang og 12 puntos kay nasipyat og 11 sa 16 niya ka itsa. Nakalangkat man tuod siya og 23 ka rebounds, apan maoy responsabli sa 20 ka turnovers sa Bucks.
Gawas sa maayong opensa sa iyang alas, partikular nga gidayeg ni coach Nurse ang depensa ni Leonard nga nakaangkla ni Antetokounmpo.
"Not only did he just play good, but he made some huge plays with some steals and rip-aways and break aways," matud pa ni Nurse.
Espesyal nga gihisgutan ni Nurse ang dunk ug driving bank shot ni Leonard nga nakapaginhawa og lawom sa Raptors uban ang 114-110 nga labaw sa nahibiling 32.4 segundos sa aksiyon.
Si George Hill maoy nangu sa Bucks uban ang 24 puntos, samtang sila si Malcom Brogdon ug Brook Lopez nagkumboya og 36 puntos sa pilderong kawsa. (BANAT NEWS)
- Latest
