Warriors amoy na ang NBA Finals

PORTLAND, Oregon — Inilapit ng Golden State Warriors ang kanilang sarili para sa ika-limang sunod na NBA Finals.

Nagbagsak si guard Stephen Curry ng 36 points para gabayan ang Warriors sa 110-99 panalo laban sa Trail Blazers sa Game Three ng kanilang Western Conference championship series.

Humakot naman si Draymond Green ng triple-double sa kanyang tinapos na 20 points, 13 rebounds at 12 assists para sa 3-0 bentahe ng Golden State sa kanilang best-of-seven series ng Portland.

Ito ang pang-pitong career postseason triple-double ni Green.

Wala pang koponan na nakabangon mula sa 0-3 deficit sa playoffs. Tatlong serye lamang ang naitulak sa Game Seven matapos kunin ng isang koponan ang 3-0 lead.

Pinamunuan ni CJ McCollum ang Blazers, nagposte ng 18-point lead, 60-42 sa second period, mula sa kanyang 23 points habang may 18 markers si Damian Lillard.

Buhat sa 53-66 agwat sa halftime ay umarangkada ang Warriors sa third quarter para angkinin ang 82-79 abante papasok sa fourth period.

Ang three-pointer ni Curry ang nagbigay sa Golden State ng 98-87 bentahe sa huling limang minuto ng labanan na hindi na naputol ng Portland.

Ang Game Three ang unang conference finals game sa Portland sapul noong 2000 kung saan inangkin ng Los Angeles Lakers ang serye sa paggiba sa Blazers sa Game Seven.

Ito ang ika-11 kabiguan ng Portland sa 12 playoff games nila ng Golden State sa huling apat na seasons.