Almazan dili pa hatagan og playing time sa Meralco atol sa commissioner's cup

CEBU, Philippines —  Posible nga dili una niya hatagan og playing time si All-Star forward Raymond Almazan sa PBA Commissioner's Cup nga buksan ugmang adlawa.

Mao kini ang gibutyag ni Meralco Bolts coach Norman Black.

Si Almazan maoy lig-ong adisyon sa Meralco human sa nahitabong trade nila tali sa Rain or Shine Elasto Painters.

Matud ni Black nga dili  niya  pakalitan si Almazan ilabi na nga miabot kaniya ang taho nga daghan og gidala-dala nga injury.

May posibilidad hinuon nga pasudlon niya si Almazan atol sa ilang duwa batok Blackwater Elite ugma, apan dili mahitabo nga ibutang dayon niya kini sa starting five.

Gawas sa kahimsog ni Almazan, gusto usab ni Black nga suhituon una sa basketbolista ang sistema sa Meralco. Kun  siya ang pabut-on, sa sunod semana pa niya gusto pasudlon sa korte si Almazan.