Magic, Bird makadawat og NBA lifetime award

CEBU, Philippines – Ang kanhi karibal nga sila si Magic Johnson ug Larry Bird gikatakda nga modawat og hiniusang Lifetime Achievement Award sa 2019 NBA Awards nga gikatakda sunod bulan.

Sila si  Johnson ug Bird maoy sentro sa makasaysayanong panagkaribal niadtong dekada '80 sa dihang ang Los Angeles Lakers ug Boston Celtics nagtigi alang sa dominasyon sa liga.

Ang duha ka banggiitang basketbolista pasidunggan sa usa ka bonggang seremonyas karong Hunyo 24 didto sa Los Angeles. Ang laing duha nga nakadawat na sa maong prestihiyosong pasidungog mao sila si Bill Russell (2017) ug Oscar Robertson (2018).

Ang panagkaribal nilang Johnson ug Bird nakadakop sa imahinasyon sa mga basketball fans atol sa ilang panahon ug nakatabang pagtuboy sa kalamposan sa modernong NBA.

Ang duha parehong nakadaog og tulo ka MVP awards ug mga sakop sa Naismith Memorial Hall of Fame.

Sakop sab sila sa nabantog nga US 'Dream Team' nga nakasakmit og bulawang medalya niadtong 1992 Olympics didto sa Barcelona, Spain.

Ang duha pareho sab nga miduwa sa tibuok nilang karera uban sa usa ka team. Si Johnson nakalangkat og lima ka korona sa NBA uban sa Lakers ug si Bird tulo uban sa Celtics.