Island Hot Wings padayong nanginit

CEBU, Philippines – Padayong gikuptan sa Island Hot Wings ang solong liderato human gilubong ang EJ & Ejean,  99-62 sa nagkainit nga aksiyon sa FYA Basketball Tournament Season 23 Yoyi's Pastries & Desserts Cup 2019 niadtong Martes didto sa Atillo gym sa Labangon, Cebu City.

Ligas kaayo ang aksiyon sa unang tulo ka kuwarter ug sulagma sab kaayo nga  molabaw lang og dos puntos ang Island Hot Wings ni Junrey Arreglo matag kuwarter, 17-15 sa unang kuwarter, 33-31 sa ikaduha ug 51-49 sa ikatulo.

Apan kalit lang sila nga milusad og makalilisang nga ataki sa fourth period aron moposte og 37 puntos nga kadaogan.

Si Jeramie 'The Beast' Flores maoy napiling best player of the game nga mikamada og 23 puntos, uban ang 12 ka rebounds ug lima ka assists.

Nakatampo sab og dako si Justine Urot nga miamot og 20 puntos, ingon man si Ranel Pataliga sa iyang 15 puntos ug Daniel Enriquez nga adunay 14 puntos. Ang team manager nga si Arreglo igo gyud nakaabot og 10 puntos sa iyang koponan nga midiga na og 4-0 nga baraha.

Ang EJ & Ejean nga gipaluyohan ni Baeng Medalle, gipangulohan ni Derick Tabares nga mitabas og 21 puntos, gisundan nilang Isyot Regudo ug Boki Teves nga nagkumboya'g 30 puntos sa koponan nga usa pa la'y daog sa upat ka duwa.

Sa laing bahin, ang Nevaeh Sales Trading hinay-hinay nga  mikatkat sa ibabaw dihang ilang gipahilom ang Z&G Pro Audio, 98-92.

Sila si Kier 'Momshie Sniper' dela Peña ug Val Ramirez parehong mikulit og 22 puntos, apan si Dela Peña maoy best player tungod sa iyang lima ka rebounds, pito ka assists ug tulo ka steals.

Laing naka-double digits maoy ang team manager niining si Jofel Tejada sa iyang 11 puntos ug Emman Reubal nga adunay 10 puntos.

Ang Z&G Pro Audio ni Dave Natividad  nga wala pa'y daog sa upat ka duwa, gipangulohan ni Kenneth Montenola pinaagi sa iyang 29 puntos. Si Dave Caballes mitampo og 15 puntos,  gisundan ni Arman Ruby Montillero sa iyang 14 puntos ug Jayvee Silvano nga adunay 10 puntos. 

Milabaw og 11 puntos sa Nevaeh sa first period, 25-14, apan nakabawi ang Z&G Pro Audio sa sunod nga kuwarter aron mailog ang labaw, 43-40 sa halftime.

Ang Nevaeh sa pagpangu nilang Dela Peña ug Ramirez mipaulan sa ilang opensiba alang sa ilang komportabling labaw, 71-65 human sa tulo ka kuwarter ug wala na sila molingi pa sukad niadto.

PUNTOS MATAG USA

Unang duwa:

ISLAND Hot Wings (99) – J. Flores 23, J. Urot 20, Patalita 15, D. Enriquez 14, J. Arreglo 10, C. Laud 8, A. Navarro 4, N. Arias 3, E. Noquillo 2.

EJ & Ejean (62) – D. Tabares 21, I. Regudo 16, B. Teves 14, A. Villarosa 4, O. Masongsong 4, K. Masongsong 3.

Ikaduhang duwa:

NEVAEH (98) – K. Dela Peña 22, V. Ramirez 22, J. Tejada 11, E. Reubal 10, R. Tabares 8, L. Mancao 8, T. Abella 5, N. Medalle 3, J. Enriquez 3,  T. Marata 2, N. Demol 2, B. Navarro 2.

Z&G (92) – K. Montenola 29, D. Caballes 15, A. Montillero 14, J.  Silvano 10, B. Tabaña 9, A. Regudo 6, D. Miano 4, V. Lastomen 3, J. Engaling 2.