Curry pinaulanan ng tres ang Blazers sa Game 1

OAKLAND, California--Nagsalpak si Stephen Curry ng siyam na three-pointers at tumapos na may 36 points para banderahan ang Golden State Warriors sa 116-94 paggupo sa Portland Trail Blazers sa Game One ng kanilang Western Conference finals.

Naglaro ang Warriors na wala si injured star Kevin Durant (strained right calf).

Tumipa si Curry ng 12-for-23 fieldgoal shooting para sa kanyang ikaapat na 30-point performance sa postseason.

Sinapawan ng two-time NBA MVP ang Portland duo nina Damian Lillard at CJ McCollum, nagtala ng pinagsamang 11-for-31 clip laban sa depensa ng Golden State.

“They had to go to a tough Game 7 in Denver (on Sunday) and a quick turnaround, so the schedule favored us,” wika ni Warriors coach Steve Kerr sa Blazers. “I thought we took advantage of the situation.”

Nagdagdag si Klay Thompson ng 26 points, kasama ang isang one-handed slam habang humakot si Draymond Green ng 12 points, 10 rebounds, 5 assists, 3 blocks at 2 steals para sa Golden State.

Tumapos si Lillard na may 19 points sa panig ng Portland kasunod ang 17 markers ni McCollum na naimintis ang lima sa kanyang anim na triples.

Nakatakda ang Game 2 sa Huwebes kung saan hindi pa rin makukuha ng Warriors ang serbisyo ng two-time reigning NBA Finals MVP na si Durant.