Sports personalities midaog, pilde sa piniliay

CEBU, Philippines – Adunay midaog ug aduna sa'y napilde sa mga sports personalities  sa piniliay niadtong Lunes.

Usa sa mga midaog mao si PBA legend Vergel Meneses nga  nagpapili pagka-mayor sa Bulacan, laing PBA great nga sila si Ato Agustin ug Yoyong Martinez midaog isip konsehal sa Pampanga ug Pasig.

Dinhi sa Sugbo, ang kanhi PBA All-Star nga si Dondon Hontiveros nakaangkon og lingkoranan sa konseha sa South District sa Dakbayan sa Sugbo, samtang ang boxing trainer ni Manny Pacquiao nga si Buboy Fernandez napiling  bise mayor sa Albay.

Ang usa sa mga sports partylist nga 1Pacman nakasud sab sa kongreso diin mobalik isip representante sila si sports patron ug NorthPort Batang Pier team owner Mikee Romero.

Kun adunay nagmadaugon, aduna sa'y mga naparot lakip na niini si Gilas Pilipinas ug NLEX Road Warriors head coach Yeng Guiao nga napilde pagka- kongresista sa Pampanga. 

Wala usab mosalir ang karisma ni Taekwondo chief Monsour del Rosario human siya mapilde pagka-mayor sa Makati, samtang ang kanhi PBA player ug amahan ni Ginebra star Japeth Aguilar nga si Peter Aguilar wala sab mapili pagka bise mayor sa Pampanga.