Hotshots, Beermen nangandam sa game-7
CEBU, Philippines – Imbes nga mopahuway alang sa kulbahinam nga Game-7 ugma, ang Magnolia Hotshots ug San Miguel Beermen parehong mipahigayon og team practice kagahapon.
Si Hotshots coach Chito Victolero miingon nga wala sila'y panahon nga mopahuway ilabi na nga usa na lang ka tsansa ang nahibilin kanila aron matuman ilang misyon nga mapalagpot sa trono ang San Miguel Beermen.
Si Victolero miingon nga giuna nila ang team practice kagahapon sa wala pa niya tugti iyang mga players nga mobotar sa eleksyon.
"Kailangan eh. Kailangan naming mag-practice. After that, saka kami boboto," matud pa ni Victolero sa ABS-CBN News.
Sa iyang bahin, si San Miguel coach Leo Austria, nagtuo nga anaa kanila ang momentum sa 'do-or-die' game, apan sayod siya nga dili sayon ang duwa ugma tungod kay seguradong may giandam nga mga kausaban ang Hotshots.
"In the past few games, we don't have any physical activities. We keep studying the film and some shooting and that's it because you can't have drastic adjustments. From Game One to Game Six, it's a matter of who wants to win." matud pa ni Austria.
Sama sa Hotshots, kompleto sab ang Beermen nga nag-ensayo kagahapon.
Ang star forward sa Beermen nga si Arwind Santos nga usa sa sayong miabot sa team practice nagkanayon nga wala sila mibati og presyur sa Game 7, apan dako ilang pagsalig sa usa'g-usa nga molampos ilabi na nga nag-apas kini og kasaysayan.
- Latest