Beermen itinulak ang Hotshots sa Game Seven
PBA Philippine Cup Finals
MANILA, Philippines — Alam na ng mga Beermern ang gagawin sa mga ganitong sitwasyon.
Inalagaan ng San Miguel ang kanilang double-digit lead patungo sa pag-angkin sa 98-86 panalo laban sa Magnolia sa Game Six para itulak ang ‘winner-take-all’ match sa 2019 PBA Philippine Cup Finals kagabi sa Smart Araneta Coliseum.
Itinabla ng Beermen sa 3-3 ang kanilang best-of-seven championship series ng Hotshots patungo sa pagtatakda ng Game Seven sa Miyerkules.
Humakot si five-time PBA MVP June Mar Fajardo ng 23 points, 18 rebounds at 2 assists para banderahan ang four-time PBA All-Filipino Cup champions.
“We wanna come out with a lot of aggresiveness and we wanna make sure to play San Miguel way,” sabi naman ni Marcio Lassiter, tumipa ng 20 markers.
Diniskaril ng San Miguel, hangad ang kanilang pang-limang sunod na PBA All-Filipino Cup crown at ika-25 sa kabuuan, ang pagsikwat ng Magnolia sa titulo.
Ipinoste ng Beermen ang 20-10 abante sa kaagahan ng first period bago ito pinalobo sa 39-20 galing sa semi hook shot ni Lassiter sa 6:05 minuto ng second quarter.
Isang 11-0 atake naman ang inilunsad ng Hotshots para ilapit ang laro sa 31-39 kasunod ang dalawang triples ni Chris Ross na naglayong muli sa kanila sa halftime, 50-36.
Sa sariling 7-0 ratsada ni Christian Standhardinger ay nailista ng Beermen ang 66-53 abante sa 3:12 minuto ng third period hanggang muling makadikit ang Hotshots sa 62-68.
Sa pagbubukas ng final canto ay isang 22-7 bomba ang inihulog ng San Miguel para sa kanilang 22-point lead, 93-71, kontra sa Magnolia, nakahugot ng 17 points kay Jio Jalalon, sa huling 4:19 minuto ng laro.
- Latest
