San Miguel humirit sa Game 4

MANILA, Philippines — Hindi hinayaan ng nagdedepensang San Miguel na lalo pang malugmok sa serye.

Niresbakan ng Beermen ang Magnolia Hotshots sa Game Four, 114-98 sa kanilang championship series para sa 2019 PBA Philippine Cup Finals kagabi sa Smart Araneta Coliseum.

Itinabla ng San Miguel sa 2-2 ang kanilang best-of-seven titular showdown ng Magnolia.

“Mabuti at nakuha namin ang panalo, Nag-step up kami lahat at nasunod ‘yung game plan namin,” ani five-time PBA MVP June Mar Fajardo na nagtala ng 31 points at 14 rebounds.

Mula sa seven-point-lead, 54-47 sa halftime ay kumawala ang Beermen sa third quarter sa likod nina Fajardo, umiskor ng 14 points, Chris Ross at Terrence Romeo para ilista ang 85-69 bentahe sa hu­ling 1:07 minuto nito.

Lalo pang nabaon ang Hotshots, kinuha ang 86-82 panalo sa Game Three noong Linggo, sa 82-99 nang umiskor si Fil-German forward Christian Standhardinger sa huling 6:09 minuto ng final canto.

Ang jump shot ni Romeo ang nagbigay sa San Miguel ng 105-88 kalama­ngan sa huling 3:50 minuto ng bakbakan para tuluyan nang selyuhan ang kanilang panalo sa Magnolia.

Samantala, muli na namang nagdagdag ng tropeo sa kanyang koleksyon si Fajardo.

Ito ay matapos hirangin ang five-time Most Va­luable Player bilang Best Player of the Conference ng 2019 PBA Philippine Cup kagabi sa Smart Araneta Coliseum.

Ito ang ikaanim na sunod na BPC award ng 29-anyos na tubong Compostela, Cebu sa All-Filipino conference.