Avtes nagsolo sa ikaduhan dapit sa FYA caging

CEBU, Philippines – Temporaryo karong nagsolo sa ikaduhang dapit sa standing ang AVTES human nila gidemolis ang District 7 Resto Bar, 79-65 sa FYA Basketball Tournament Season 23 Yoyi's Pastries & Desserts Cup 2019 niadtong Martes didto sa Atillo gym sa Labangon, Cebu City.  Si Roland 'The Answer' Canoy nga maoy best player of the game miposa og 26 puntos aron pangulohan ang AVTES nga igo lang milabaw og otso puntos human sa tulo ka kuwarter, 56-48.Kontrolado hinuon sa AVTES ang maong duwa.

Naka-double digits sab silang Dexter Caballero, Ryan Villaver ug Wako Dacayana alang sa AVTES nga aduna na karo'y 3-1 nga baraha.

Ang District 7 Resto Bar gipangulohan ni Francois Paracuelles nga miposa og 19 puntos, samtang sila si Jim Jim Rara ug Alexis Pepito nitampo'g 10 puntos matag usa alang sa ilang 2-2 nga record.

Nagbitbit sab og 2-2 nga baraha ang Nevaeh Sales Trading human makaipsot sa Yoyi's Pastries & Desserts, 110-107.

Si Val 'The Assassin' Ramirez maoy topscorer sa Nevaeh pinaagi sa iyang 29 puntos nga gidayandayanan og siyam ka rebounds ug siyam sab ka assists nga igo na kaayo aron ilhong best player of the game.

Dako sab og natampo si Emman Reuban nga miamot og 18 puntos ug silang Noel Medalle ug Lourienze Mancao nga parehong mitampo'g 15 puntos sa Nevaeh Sales Trading nga wala na molingi pa human miposte og 81-74 nga bentaha sa third quarter.

Nangulo sa 1-3 nga  Yoyi's Pastries mao si Reyboy Caballes nga mibugha og 35 puntos, gisundan sa team  manager niining si Ahlmark Albarracin sa iyang 22 puntos. Si Jake Ursal mitikdol og 14 puntos, samtang sila si Junjie Martinez ug Jao Rabadon miabuno'g 13 puntos matag usa sa napildeng Yoyi's Pastries.