E&F Surplus mibira no. 1 spot sa CLBA 2
CEBU, Philippines — Wala pabangbang ang E&F Surplus ug ilang gyud nga gibira ang no. 1 spot pagtapos sa elimination round sa CLBA Season 2 basketball tournament niadtong Sabado didto sa GT Academy gym sa Tayud, Lilo-an.
Ang multi-titled E&F Surplus mipilde sa 4Nichol's Basketball sa iskor nga 73-69.
Gitapos nila ang elimination round bitbit ang 9-2 nga baraha aron makabaton og 'twice-to-beat' advantage sa quarterfinals uban sa no. 2 nga Kalubi-an.
Harungon sa E&F Surplus ang no. 8 Princess Shaira, samtang ang Kalubi-an moharong sa no. 7 J&J Surplus.
Magtagakay sa quarterfinals ang no. 3 Chichay's Chicharon batok no. 6 Philcement ug ang no. 4 Jonghap Tang-an batok no. 5 nga 4Nichol's Basketball.
Si Kenn Nuñez miratsada og 28 puntos aron pangulohan ang E&F Surplus nga nabiyaan og kuwatro puntos human sa tulo ka kuwarter. apan ang E&F Surplus padayong misungasong sa tungason nga dalan aron maangkon ang kutas nga kadaogan.
Sila si Edu Pepito ug Arprel Sabang nagkumbinar og 24 puntos sa E&F Surplus ni team owner Fury Trazona, kinsa nalimitahan lang ngadto sa siyete puntos, mas ubos sa iyang 20 points average.
Gipangulohan sab ni Niño Icot ang 4Nichol's pinaagi sa iyang 19 puntos.
Sa lain pang duwa, ang Princess Shaira nakalingkawas sab sa kulbahinam nilang duwa batok sa J&J Surplus, 74-72.
Upat ka players ang miposa og double figures sa Princess Shaira ni Rommel Bucatan.
Si Larry Oroyan maoy topscorer sa J&J Surplus nga miarangkada og 21 puntos, gisundan ni Terrence Cadao sa iyang 18 puntos ug Mardonio Casper nga adunay 10 puntos.
Ang liga nga nahimo pinaagi sa paningkamot sa presidente niining si Arnold Labustro ug bise presidente Henry Agbon, gipaluyohan sa Union Galvasteel ug J&J Surplus.
Ang mga duwa gipadagan ni league commissioner Fury Trazona sa abag nilang Chang Tejero ug Eric Montebon.
Puntos Matag Usa
Unang duwa:
E&F SURPLUS (73) – Nuñez 28, Pepito 13, A. Sabang 11, Trazona 7, Betinol 6, Igoy 6, Ursal 2.
4NICHOL's (69) – Icot 19, Lascuna 8, Calexterio 8, Cañete 7, Japos 5, Berandal 5, Owatan 3, Ponce 3, Hernando 3.
Ikaduhang duwa:
PRINCESS SHAIRA (74) – Gitgano 20, Ylanan 15, Manatad 13, Suico 12, Gamao 8, Alimpoos 6.
J&J SURPLUS (72) – Oroyan 21, Cadao 18, Casper 10, Adolfo 8, Cabahug 8, Tiwan 7. (BANAT NEWS)
- Latest
