Rockets lusot sa Warriors sa overtime
HOUSTON — Hindi pumayag ang Rockets na mabaon sa 0-3.
Kumonekta si James Harden ng mahalagang three-point shot sa overtime at tumapos na may 41 points para akayin ang Houston sa 126-121 panalo laban sa Golden State Warriors sa Game Three ng kanilang Western Conference semifinals series.
Idinikit ng Rockets sa 1-2 ang best-of-seven wars nila ng Warriors.
“That’s James. That’s what he does,” pagpuri ni Houston head coach Mike D’Antoni kay Harden.
Nagdagdag si guard Eric Gordon ng playoff career-high na 30 points kasama ang playoff-best na pitong 3-pointers para sa Rockets.
“It’s all about bringing something to the table, offensively, defensively every single night to give yourself a chance to win,” wika ni Gordon,
Pinuwersa ni Harden ang laro sa extra period mula sa kanyang dalawang free throws sa dulo ng fourth period.
Ang layup ni P.J. Tucker ang nagbigay sa Rockets ng three-point lead sa huling tatlong minuto ng laro, habang naimintis ng Warriors ang kanilang mga tira sa huling dalawang posesyon sa extension.
Ang triple ni Harden sa huling 49 segundo ang nagbigay sa Houston ng 124-118 abante.
Tumipa naman si Kevin Durant ng tatlong free throws para muling ilapit ang Golden State sa 121-124.
Umiskor si Harden ng layup para muling ilayo ang Rockets at hindi naman naipasok ni Stephen Curry, nagkaroon ng dislocated finger sa Game Two, ang kanyang wide-open layup sa posesyon ng Warriors.
Kumamada si Durant ng 46 points para banderahan ang Golden State.
Tumapos si Curry na may 17 points para sa Warriors at kumolekta si forward Draymond Green ng triple-double mula sa kanyang 19 markers, 11 rebounds at 10 assists.
- Latest
