Chichay's Chicharon mipakaging sa Jonghap

CEBU, Philippines – Yano kaayo nga miiskor og daog ang Chichay's Chicharon gumikan kay ilang gilat-an ang Jonghap Tang-an, 78-63 sa Consolacion Lilo-an Basketball League  Season 2  niadtong Huwebes didto sa GT Academy gym sa Tayud, Lilo-an.

Nanginit og maayo silang Bebe Armian ug Louie Pepito nga nagkumboya'g 34 puntos aron mangulo sa scoring sa Chichay's Chicharon nga miposte og 22-7 human sa unang 10 minutos sa duwa.

Napiksan sab sa ilang kainit silang Walter Baring ug Johnrey Caparoso nga miambit og 12 puntos matag usa alang sa Chichay's Chicharon ni team owner Wendy Quiapo ug playing team manager Jun Rayan Pepito.

Ang Jonghap Tang-an gipangulohan sab ni Arthur 'Atoy Co' Pitogo nga mikulit og 17 puntos, gisundan ni Levie Sofia nga adunay 13 puntos.

Sa laing duwa,  ang Philcement naka-sagunson og duha ka daog human gipilde ang Pilapilan, 77-71.

Gipangulohan na sab ni Louise Pepito ang Philcement nga miugkat og 23 puntos.

Kuyaw sab kaayo nga nakaduwa ang team manager nga si Bobong Tiongson nga miugbok og 20 puntos, samtang si Randy Mantos mibugwal og 10 puntos sa Philcement nga mao na ang mikontrolar sa duwa human sa 59-54 nga abante sa third quarter.

Ang Pilapilan gipangulohan ni Diamond Mendoza nga mikabkab og 19 puntos, gisundan sa team manager niining si Kingsley Caparoso sa iyang 15 puntos ug CJ Pilapil nga adunay 10 puntos.

Ang Princess Shaira midaog na sab batok sa Nazarene Basketball, 70-60.

Mismo ang team manager nga si Rommel Bucatan ang nangu sa tulo  ka Princess Shaira player nga miiskor og double figures pinaagii sa iyang 23 puntos.

Si Recilen Manatad sab ang topscorer sa Nazare sa iyang 21 puntos.

Ang liga nga natukod pinaagi sa paningkamot sa presidente niining si Arnold Labustro ug bise presidente Henry Agbon, gipadagan ni commissioner Fury Trazona.

Gipaluyohan kini sa Union Galvasteel ug J&J Surplus.

PUNTOS MATAG USA

Unang duwa:

CHICHAY'S Chicharon (78) – Armian 18, L. Pepito 16, Baring 12, Caparoso 12, Sayta 8, Cortes 3, A.Pepito 3, Rojo 2.

JONGHAP Tang-an (63) – Pitogo 17, Sofia 13, Bonghanoy 10, Cabalhug 9, Entrampas 4, Entrampas 4, Raffe 4, Lascuna 2.

Ikaduhang duwa:

PHILCEMENT (77) –  L. Pepito 23, B. Tiongson 20, Mantos 10, Dejarme 9, Gaite 3, Gestopa 3, Lozano 2, Retiza 2.

PILAPILAN (71) – Mendoza 19, K. Caparoso 15, Pilapil 10, Royaks 9, Domingo 8, Orque 6, Olande 3.

Ikatulong duwa:

PRINCESS Shaira (70) – Bucatan 23, Gitgano 18, Sanchez 13, Suico 8, Gamao 4, Manatad 2.

NAZARENE (60) – R. Manatad 21, Tubod 12, Ramirez 8, Sinugbuhan 6, Cabantugan 4, Anjilo 4.