Blaze Spikers, Cargo Movers pukpukan sa game 1

MANILA, Philippines — Asahan ang matinding bakbakan sa pagitan ng nagdedepensang Petron at F2 Logistics sa paglarga ng Game 1 ng Philippine Superliga Grand Prix best-of-three finals ngayong araw sa The Arena sa San Juan City.

Nakatakda ang engkuwentro ng Blaze Spikers at Cargo Movers sa alas-7 ng gabi habang maghaharap ang Cignal at PLDT sa battle-for-bronze match sa alas-4:15 ng hapon.

Mataas ang morale ng Petron na may 17-game winning streak.

Nakumpleto ng Blaze Spikers ang 14-0 sweep sa eliminasyon na ipinagpatuloy nito sa paggupo sa Sta. Lucia Realty sa quarterfinals at Cignal sa semifinals.

Dalawang panalo na lamang ang kailangan ng Petron para maulit ang kanilang sweep sa season noong magkampeon sa 2015 All-Filipino Confe­rence.

Ngunit ayaw magpa­kampante ni Petron head coach Shaq Delos Santos dahil ibang usapan na ang finals.

“The sweep in the preliminaries is over. This is now a brand-new challenge for us. We have to double our effort if we want to be back-to-back champions. We know for sure that they will try their best to win Game 1 to gain momentum and dictate the tempo of this series,” ani Delos Santos.

Alam ni Delos Santos na hindi madaling kalaban ang Cargo Movers na mamanduhan ni reigning MVP Lindsay Stalzer na dating import ng Blaze Spikers.

“She knows what it takes to win. I’m sure Lindsay will go all out so we have to be ready,” dagdag ni Delos Santos.

Maliban kina super imports Stephanie Niemer at Katherine Bell, sasandalan din ng Petron sina local aces Mika Reyes, Aiza Maizo-Pontillas, Denden Lazaro at Rhea Dimaculangan.

Makakatuwang naman ni Stalzer si Venezuelan MJ Perez na malalim na rin ang karanasan sa championship series.

Sa katunayan, tinulungan ni Perez ang F2 Logistics na magkampeon noong 2017 Grand Prix.

Kailangan lang nina Stalzer at Perez ng solidong suporta mula sa locals partikular na kay playmaker Alex Cabanos gayundin kina Aby Maraño, Majoy Baron, Dawn Macandili at Ara Galang.