BJ Pepito double champ sa Medellin motocross

CEBU, Philippines — Ang tadhan nga Sugboanong rider nga si BJ Pepito sa BP8 Racing maoy nangu sa listahan sa mga mananaog human milugwa nga double champion sa 2019 Mayor Joven Mondigo Invitational Motocross niadtong weekend didto sa lungsod sa Medellin amihanang bahin sa Sugbo.

Ang gibansagan nga 'Wonder Boy' sa Daanbantayan misilhig sa mga titulo sa pro open ug expert division.

Gipukan sa 17-anyos nga si Pepito si Denmark Supatan sa parehong kategoriya. Si PJ Galia maoy na-3rd sa expert ug si Earlun Codiniera sa pro open.

Sama ni Pepito, sila si PJ Galia, Deolito Codiniera, Renren Hisoler ug Jeanette Olanda milangkat sab og tagurha ka korona.

Si PJ Galia maoy midominar sa intermediate ug beginners open production. Gisundan siya ni Erthron Codiniera ug Denmark Supatan sa intermediate.

Wala sab magpabitin si Deolito Codiniera nga maoy nanghawod sa elite category ug ingon man sa executive C diin siya gisundan nilang John Go ug Richard Linawagan.

Sa iyang bahin, si Renren Hisoler maoy naghari sa open enduro batok nilang Khalil Sanchez ug Pascual Montebon ug ingon man sa novice open production human gibuntog silang Brylle Ornopia ug Gyle Aguilar.

Laing pang mga category winners mao sila si John Hisoler (local enduro), Britz Hisoler (executive B), Allan Padica (veterans), Siegfred Ornopia (executive A). Jeanette Olanda (ladies division ug mini class 50cc), Terence Codiniera (mini class 65cc), Carlo Comendador (mini class 85cc), Rey Tigue  (buggy) ug Jomar Villaban (underbone).

Ubos sa superbisyon ni Cebuano businessman-sportsman Lou Ornopia sa MS Motosuit, nahapsay ang pagpadagan sa kulbahinam nga lumba gumikan sab sa paningkamot nilang Caloy Aguilar, Jimboy Opone, Chito Poro, Randy Camus, Vilma Opone, Danny Albano, Butch Flores, Rey Quinal ug Ronald Panungaling. (BANAT NEWS)