Creamline desididong maidepensa ang titulo
MANILA, Philippines — Desidido ang Creamline Cool Smashers na maidepensa ang kampeonato dahil kumuha ito ng dalawang mahuhusay na imports para sa Premier Volleyball League Reinforced Conference na magsisimula sa Mayo.
Muling kinuha si Thai outside hitter Kuttika Kaewpin habang masisilayan sa kauna-unahang pagkakataon sa Pilipinas si Venezuelan Aleoscar Blanco para makatulong sa kampanya ng Cool Smashers.
Kasama si Kaewpin nang magkampeon ang Cool Smashers noong nakaraang taon kung saan tinalo ng tropa ang PayMaya, 2-0 sa best-of-three title series.
Sa kabilang banda, malalim ang karanasan ng middle blocker na si Blanco na nakapaglaro na sa pitong bansa bago magtungo sa Pilipinas.
Nasilayan na ito para sa Vargas Team sa Venezuela noong 2008 hanggang 2011 habang nakapaglaro na rin ito sa Spain (Ciudad Las Palmas Cantur), Azerbaijan (Igtisadchi Baku), Greece (Olympiacos Piraeus), Thailand (Supreme Chonburi), Serbia (VTC Pezinok) at sa Peru (Sporting Cristal, Universidad San Martin at Regatas Lima).
Itinanghal itong Best Middle Blocker sa Thailand League noong season 2017-2018 habang nagkampeon ito para sa Supreme Chonburi sa Thailand League at Thai-Denmark Super League noong 2018.
Naging bahagi si Blanco ng Venezuelan national team na naglaro sa 2008 Olympic Games sa Beijing, China.
Maliban kay three-time UAAP MVP Alyssa Valdez, makakasama nina Kaewpin at Blanco sina 2018 Reinforced Conference Finals MVP Jia Morado, middle hitter Risa Sato, opposite spiker Michele Gumabao at Melissa Gohing.
- Latest
