Island Hot Wings lider na sa FYA season 23
CEBU, Philippines – Ang Island Hot Wings mipilde sa NEVAEH Sales Trading, 74-64 aron temporaryong magsolo sa liderato sa FYA Basketball Tournament Season 23 Yoyi's Pastries & Desserts Cup 2019 niadtong Martes didto sa Atillo gym sa Labangon, Dakbayan sa Sugbo.
Ang best player nga si Michael 'D Ex-Mayor' Garcia mikadlit og 19 puntos aron mangulo sa scoring sa Island Hot Wings ni Junrey Arreglo nga aduna na karo'y 2-0 nga baraha.
Nakatampo sab og dako sa kadaogan si Daniel Enriquez nga mitimbre og 18 puntos, samtang si Justine Urot miambit og 10 puntos sa Island Hot Wings, kansang dos puntos nga labaw sa third quarter, 56-54 gikalingawan og bingat hangtod nahurot ang oras sa duwa.
Ang NEVAEH Sales Trading ni Jofel Tejada nga adunay 1-1 win-loss record, gipangulohan nilang Noel Medalle ug Emman Reubal nga nagkumboya'g 27 puntos. Si Medalle miburak og 15 puntos, samtang si Reubal mibahog og 12 puntos.
Sa laing aksiyon, Ang EJ & Ejean miiskor sab og daog pinaagi sa paglubong sa AVTES sa iskor nga 73-59.
Si Sherlou 'The Daredevil' Solitorio maoy nangulo sa upat ka EJ & Ejean players nga mikulit og double figures pinaagi sa iyang 20 puntos ug nga igo na kaayo alang kaniya aron mahimong best player of the game.
Sila si Isyot Regudo ug Dandan Bocado mitampo'g 14 puntos matag usa ug si Boki Teves miambit og 10 puntos sa EJ & Ejean nga dominante kaayo gikan sa pagsugod dayon na pagkulit og 14 puntos nga kadaogan.
Sila lang si Dexter Caballero ug Jas Sydiongco ang miiskor og double digits sa AVTES nilang Macky Macachor/Allen Tulod nga parehong miantog og 13 puntos.
Ang EJ & Ejean ug AVTES pareho na sab nga nagbitbit og 1-1 nga baraha.
PUNTOS MATAG USA
Unang duwa:
ISLAND Hot Wings (74) – M. Garcia 19. D. Enriquez 18, J. Urot 10, V. Ensong 8, R. Patalita 6, C. Laud 6, J. Flores 4, N. Arias 3.
NEVAEH (64) _ N. Medalle 15, E. Reubal 12, V. Ramirez 9, J. Enriquez 9, N. Embodo 7, J. Tejada 5, L. Mancao 3, T. Marata 2, K. Dela Peña 1, B. Navarro 1.
Ikaduhang duwa:
EJ & EJEAN (73) – S. Solitorio 20, I. Regudo 14, D. Bocado 14, B. Teves 10, B. Demol 4, T. Santillan 4, O. Masongsong 3, D. Tabares 2, K. Masongsong 2.
AVTES (59) – D. Caballero 13, J. Sydiongco 13, A. Tulod 9, R. Villaver 8, R. Canoy 5, R. Laput 4, W. Dacayana 2, R. Dechosa 2, G. Ares 2, C. Quintos 1.
- Latest
