Romeo dako'g matabang sa SMB

CEBU, Philippines – Ang duha ka haligi sa San Miguel Beermen nga sila si Arwind Santos ug JuneMar Fajardo nagtuo nga makatabang og dako si  Terrence Romeo sa  kampanya nila sa pagpanalipod sa ilang All-Filipino Cup title.

Ang Beermen nga maoy unang miabante sa finals makigsangka sa modaog sa semifinals series tali sa Magnolia Hotshots ug Rain or Shine Elasto Painters.

Si Santos nagkanayon nga si Romeo maoy  labing epektibo nilang hinagiban sa finals tungod kay nakasagop na kini sa sistema ni Beermen coach Leo Austria.

Sa semifinals series batok Phoenix, si Romeo mipakita sa iyang  kahait sa opensa nga maoy mibungkag sa depensa sa ilang kaatbang.

"Malamang mas tataas ang kumpiyansa niya at isa yun sa magpapalakas sa San Miguel," matud pa ni Santos sa PBA.com.

"Si Terrence pag tumaas ang kumpiyansa, mas mahirap kaming talunin sinasabi ko sa inyo."

Ang reigning MVP nga si Fajardo miingon nga si Romeo ang misalbar sa iyang koponan dihang naglisud siya sa opensa tungod   kay siya ang nasentro sa depensa sa Phoenix.

"Sana tuloy-tuloy nilalaro niya, malaking factor siya sa finals," matud pa ni Fajardo.

Si Romeo nga moduwa sa labing una niyang PBA finals mi-average og 17.3 points sa playoffs.