Obiena lumundag ng bagong marka
MANILA, Philippines — Inangkin ni EJ Obiena ang gintong medalya sa pole vault event ng 23rd Asian Athletics Championships sa Doha, Qatar sa pamamagitan ng record-breaking performance.
Lumundag ang 23-anyos na si Obiena ng 5.71 metro para talunin sina Zhang Wei at Huang Bokai ng China na naglista ng parehong 5.66m.
Nanguna sina Zhang, ang Asian Indoor silver medalist na kumuha ng gold medal sa nasabing event sa Wuhan, China noong 2017 at Huang, dating Asian Junior champion at 2016 Asian Indoor gold medal winner, sa unang tatlong attempts bago nangibabaw si Obiena sa huling tatlo niyang attempts.
Ang nasabing lundag ni Obiena ang bagong Asian Athletics Championship record para burahin ang sarili niyang national mark na 5.61m na kanyang itinala sa Stabhochsprung Classic sa Leverkusen, Germany noong 2017.
Dahil dito ay nakakuha si Obiena ng tiket para sa 2019 World Championships sa Sept. sa Doha.
Ang 5.71m ni Obiena ay mas maganda sa kasalukuyang Southeast Asian Games record na 5.35m na inirehistro ni reigning gold medal winner Porranot Purahong ng Thailand noong 2017 edition ng biennial meet sa Kuala Lumpur, Malaysia.
Pumangalawa si Obiena kay Purahong sa nasabing SEA Games.
- Latest