San Miguel uli sa game 2

MANILA, Philippines — Naging pisikal ang Phoenix sa loob ng 48 minutong paglalaro.

Ngunit sa huli ay lumabas pa rin ang championship poise ng San Miguel.

Bumangon ang Beermen mula sa 12-point deficit sa second period para patumbahin ang Fuel Masters, 92-82 sa Game Two at ilista ang 2-0 bentahe sa kanilang semifinals duel sa 2019 PBA Philippine Cup kagabi sa Smart Araneta Coliseum.

Dinuplika ng San Miguel ang kanilang 100-88 panalo sa Game One para iposte ang 2-0 bentahe sa kanilang  best-of-seven semis showdown ng Phoenix.

“After the first half we felt like we can get some stops and grind it and grind it,” sabi ni shooting guard Marcio Lassiter, kumolekta ng 24 points, 7 rebounds at 3 assists.

Nilimitahan ng Fuel Masters si five-time PBA MVP June Mar Fajardo ng Beermen sa 5 points sa first half para iposte ang 12-point lead, 40-28 sa 5:10 minuto ng second period mula sa three-point shot ni RJ Jazul.

Napatalsik si San Miguel Fil-German forward Christian Standhardinger sa 6:10 minuto ng nasabing yugto matapos sipain si Calvin Abueva ng Phoenix sa maselang bahagi ng kanyang katawan.

Ganap na naagaw ng Beermen ang kalamangan sa 74-72 mula sa basket ni Terrence Romeo sa 5:41 minuto ng final canto patungo sa 84-80 pag-iwan sa Fuel Masters galing sa triple ni Lassiter sa huling 2:01 minuto ng laro.

Samantala, kailangang maiposte ng Rain or Shine ang matayog na 3-0 bentahe sa kanilang best-of-seven semifinals series ng Magnolia bago ang Semana Santa.

 Tinalo ng Rain or Shine ang Magnolia sa Game One, 84-77 at sa Game Two, 93-80 at hangad makalapit  sa korona sa best-of-seven championship series.