Mandaue padayong nanginit, gipatilaw ang Danao og pilde
CEBU, Philippines – Padayong nanginit ang 6th District champion Mandaue City hinungdan nga gipatilaw niini og pilde ang Danao City sa labing unang higayon, 76-69 pagsugod sa quarterfinal round sa 2019 Cebu Governor's Cup Inter-Cities and Municipalities Under 21.
Developmental Basketball Tournament niadtong Miyerkules sa gabii didto sa Dumanjug municipal gym.
Ang idlas nga pointguard nga si Gabriel Cometa ug si Archie Buscay nagkumbinar og 31 puntos alang sa Mandaue ni coach Gary Cortes nga wala na molingi pa sukad miposte og 41-27 nga labaw sa halftime dayon na ngadto sa pagkadlit sa ikaupat nilang sagunson nga daog human masugamak sa nag-una nilang duha ka duwa.
Sa laing mga duwa sa Bracket A, ang 4th District champion Medellin milampurnas sa Samboan, 90-59, samtang ang Balamban mipakaging sa Samboan, 77-71.
Didto sa Tuburan municipal gym alang sa Bracket B nga aksiyon, ang Tuburan mipahimus sa ilang homecourt advantage aron ilubong ang Alegria, 98-75, samtang gikastigo sab sa Minglanilla Archangels ang Tabuelan, 95-69.
Wala sab magpa-alkansi ang Consolacion Sarok Weavers nga milubong sa Sogod, 98-79 luyo sa 29 puntos nga eksplosyon ni Keith Padoyogdog.
Ang 14-team quarterfinals magsubay og single round robin format diin ang top 2 matag bracket moabante sa crossover semis.
Ang mga mananaog maoy mag-abot sa kampiyonato nga nagtangag og P500,000 nga ganti sa usa ka best-of-three series.
- Latest