Sotto andam moduwa sa Gilas

CEBU, Philippines – Bisan didto pa siya sa Estados Unidos nag-ensayo, ang Pinoy teen sensation nga si Kai Sotto andam gihapon nga moduwa sa Gilas Pilipinas kun ugaling kinahanglanon iyang serbisyo.

Si Sotto atua na sa Atlanta diin siya mipaubos sa intensive training ubos sa giya ni Rory Jones, ang physical trainer ni Gilas naturalized center Andray Blatche.

Ang amahan ni Kai ug kanhi PBA bigman nga si Ervin Sotto miingon nga duha ka buwan mag-ensayo iyang anak sa US pangandam sa iyang tungason nga dalan paingon sa NBA.

Si Sotto naghuwat usab og tawag gikan sa lima ka European clubs nga mitanyag kaniya og kontrata aron moduwa sa Euroleague. Kini naglakip sa Real Madrid, FC Barcelona, Baskonia, Alba Berlin ug Movistar Estudiantes.

Hinuon, ang  Ervin nagkanayon nga usa gihapon sa prayoridad sa iyang anak ang pagserbisyo sa nasud pinaagi sa pagduwa sa Gilas. 

Kun ugaling dili malakip sa line-up alang sa World Cup karong Agosto 31 hangtod sa Septiyembre 15 didto sa China, ang 7-foot-2 nga si Kai  mangandam na lang alang  sa  2023 World Cup diin usa ang Pilipinas sa mo-host.