Jordan maoy 'G.O.A.T.'

CEBU, Philippines — Si Michael Jordan ug dili si LeBron James maoy G.O.A.T. (greatest player of all time) segun sa survey sa NBA players nga gimantala sa The Athletic kagahapong adlawa.

Gi-survey sa maong sports news website ang 127 ka NBA players gikan niadtong Marso 16 ngadto sa Abril 1 diin ila kining gipatubag sa pipila ka mga pangutana nga may kalambigitan sa basketbol.

Sa pangutana kun kinsa ang player nga angayang ilhon isip labing maayo sa kasaysayan, nagkahiusa ang 112 ka players sa ilang hukom.

Basi sa survey, 73 porsiyento ang nagtuo nga si six-time NBA champion Jordan maoy labing ngilngig nga baskebolista sa kasaysayan. Si James maoy ikaduha uban ang 11.9 porsiyento sa mga boto ug gisundan kini ni Kobe Bryant uban ang 10.6 percent.

Sa susamang survey, si James Harden sa Houston Rockets maoy gipaboran nga modaog pagka-MVP ning season.  Napuhalan ni Harden sila si Giannis Antetokounmpo sa Milwaukee Bucks ug Paul George sa Oklahoma City Thunder.