Celtics daog sa Heat

CEBU, Philippines – Si Gordon Hayward mikadlit og 11 sa iyang 25 puntos sa katapusang kuwarter sa dihang gipatikangkang sa Boston Celtics ang Miami Heat, 112-102 sa NBA kagahapon.

Pait kaayo ang maong kaparotan alang sa Heat gumikan kay nakatagak kini sa ilang puwesto sa playoffs.

Si Kyrie Irving mitampo og 23 puntos ug si Al Horford mihipos og 21 puntos sa Celtics.

"It was a tough one," matud pa ni Hayward nga kausa lamang masipyat sa 13 niya ka free throws. "It's tough to beat a team twice in a row like that, especially at home, they're desperate."

Sud na sa playoffs ang Celtics, apan padayong mangolekta og daog aron makaangkon og homecourt advantage sa post-season.

Ang Celtics nagtabla karon ug ang Indiana Pacers sa ikupat nga dapit sa Eastern Conference bitbit ang managsamang 47-32 win-loss records.

Didto sa Detroit, gilubong sa Indiana Pacers ang Pistons sa iskor nga 108-89.

  Si Thaddeus Young mihipos og 21 puntos, samtang sila si Bojan Bogdanovic ug Myles Turner mitampo'g 17 puntos matag usa alang sa Pacers nga mipukan sa Pistons sa ikaduhang higayon sud lamang sa tulo ka adlaw.

Sa laing pang mga duwa, gipukan sa Toronto Raptors ang Brooklyn Nets, 115-105, samtang ang Orlando Magic mipakaging sa New York Knicks, 114-100  aron ilogan ang Heat sa ikawalong puwesto sa Eastern Conference.