Khan salig modaog batok Crawford

CEBU, Philippines —  Sayod si Amir Khan nga lisud nga hagit ang nagpaabot kaniya.

Gani sa opinyon sa publiko, nipis kaayo ang iyang tsansa nga modaog.

Tataw nga bug-at gyud nga misyon ang pas-anon sa 32-anyos nga si Khan kay iyang banggaon mao man ang wa'y pildeng si Terence Crawford karong Abril 30.

Matud pa ni Khan nga iyang gitamod si Crawford isip usa ka banggiitan ug dekalibreng kontra, apan sa susamang higayon iya kining gilantaw nga oportunidad aron pamatud-an nga sayop ang pagtuo sa kadaghanan ngadto kaniya.

"I'm not taking this fight lightly; I know I can win with my boxing skills," matud pa ni Khan nga nagbitbit og 33-4 record uban ang 20KOs.  "This is the time when I can prove myself and prove everyone (else) wrong."

Mas dako man tuod siya, apan si Khan nagkanayon nga iyang gamiton ang iyang abilidad ug utok aron patilawon og pilde si Crawford.