Thunder nanuktok sa playoffs

CEBU, Philippines – Si Paul George mikadlit og 31 puntos samtang si Russell Westbrook mirehistro og triple-double  sa dihang gibugha sa Oklahoma City Thunder ang Indiana Pacers, 107-99, aron pahayagan ang ilang kampanya nga makasud sa NBA playoffs.

Dako sab og naambag si Steven Adams nga mihipos og 25 puntos ug 12 ka rebounds alang sa Thunder nga dali nakabawi sa makapakurat nilang kaparotan batok sa Memphis Grizzlies niadtong Martes. Si Westbrook, sa iyang bahin, mikolekta og 17 puntos, 11 ka rebounds ug 12 ka assists alang sa ika-29 niyang triple-double karong season nga gikahimuot kaayo sa bagang duot sa ilang fans didto sa Chesapeake Energy Arena.

Sa kinatibuk-an, mao kadto ang ika-133 nga triple-double ni Westbrook, lima na lang ang kuwang aron makatabla siya ni Magic Johnson sa ikaduhang puwesto sa listahan sa NBA players nga dunay labing daghan nga triple-double. Nag-una sa listahan si Oscar Robertson nga mipupo og 181 ka triple-double sa mabulokon niyang karera.

Ang Thunder alkansi og nuybe puntos sa halftime, 54-45, apan milusad og nagkayong 24-0 rally sa ikatulong kuwarter aron patikyaobon ang Pacers.

Si Bojan Bogdanovic dunay 28 puntos samtang si Domantas Sabonis mitali og 18 puntos sa pilderong Pacers.