Young itinakas ang Hawks; Mavs wagi sa Warriors
ATLANTA -- Nagbagsak si guard Trae Young ng 32 points, kasama ang last-second, go-ahead floater, para ilusot ang Hawks kontra sa bisitang Philadelphia 76ers, 129-127.
Tinapos ng Atlanta ang six-game winning streak ng Philadelphia, nakahugot kay center Joel Embiid ng 27 points at 12 rebounds, habang may 25 markers si Jimmy Butler.
Nagdagdag si Taurean Prince ng 23 points para sa Hawks.
Sa huling 3.5 segundo ay kinuha ni Young ang inbound pass mula kay Kevin Huerter at nilusutan si Butler para sa kanyang short jumper sa natitirang 0.1 segundo ng final canto.
Sa Oakland, nagposte si rookie sensation Luka Doncic ng triple-double, habang umiskor si Dirk Nowitzki ng season-best 21 points para banderahan ang Dallas Mavericks sa 126-91 paggiba sa Golden State Warriors.
Sinamantala ng Dallas ang hindi paglalaro ni Stephen Curry para tapusin ang kanilang tatlong sunod na kabiguan at ilaglag ang Golden State sa top seed sa Western Conference sa ilalim ng Denver.
Tumipa si Kevin Durant ng 25 points kasunod ang 19 markers ni DeMarcus Cousins para sa Warriors, nagtala ng mahinang 4-for-30 shooting sa three-point range, kasama ang 0-of-8 ni Durant at 0-of-4 ni Klay Thompson.
Tumapos si Doncic na may 23 points, 11 rebounds at 10 assists para sa unang panalo ng Mavericks sa Oakland matapos ang 12 sunod na kamalasan sapul nang manalo noong Abril 2012.
Sa Washington, humugot si Dwyane Wade ng 11 sa kanyang 20 points sa fourth quarter para ihatid ang Miami Heat sa 113-108 pagdaig sa Wizards.
Nanatili ang Miami sa eighth place sa Eastern Conference.
Nagdagdag si Wade ng 9 rebounds at tumapos sa double digits sa pang-siyam na sunod na laro ng Heat.
Ito na ang huling season ng 13-time All-Star.
Nag-ambag sina Dion Waiters at Josh Richardson ng 19 at 18 points, ayon sa pagkakasunod, para sa Miami, inungusan ang Orlando sa labanan sa huling playoff spot sa East.
Sa Chicago, humakot si center Rudy Gobert ng 21 points at 14 rebounds para banderahan ang Utah Jazz sa 114-83 panalo sa Bulls.
Nag-ambag si Donovan Mitchell ng 16 points at 8 rebounds, habang may 13 markers si Derrick Favors para sa Jazz.
Pinamunuan naman ni Lauri Markkanen ang Bulls mula sa kanyang 18 points at 10 rebounds.
Sa Memphis, kumabig si big man Karl-Anthony Towns ng 33 points at 23 rebounds para igiya ang Minnesota Timberwolves sa 112-99 pagpapabagsak sa Grizzlies.
Nagtayo si Andrew Wiggins ng 22 points kasunod ang 17 markers ni rookie Josh Okogie para sa Timberwolves.
- Latest
