Mandaue namungot sa Governor's Cup
CEBU, Philippines — Human mapukan og usa lamang ka lugas sud sa duha ka sagunson nga higayon, bangis nga nanimalos ang Team Mandaue ug una niining gipahimungtan sa ilang kayugot ang Cordova nga ilang gilat-an og 29 puntos, 104-75 sa 6th District action sa 2019 Cebu Governor's Cup Inter-Cities and Municipalities Under 21 Developmental Basketball Tournament niadtong Biyernes sa gabii didto sa Mandaue City Cultural and Sports Complex.
Dalaygon kaayo ang maong pagbangon dili lamang sa Team Mandaue, apan hasta sab sa ilang coach nga si Gary Cortes nga usa ka Cebu Schools Athletic Foundation, Inc. (CESAFI) grandslam champion uban sa University of the Visayas (UV) Green Lancers human sila makatilaw og makapakurat nga kapildihan sa Cordova, 88-89 niadtong Marso 17 didto sa Cordova Sports Complex.
Duha ka adlaw sa wala pa mahitabo, ang Mandaue nasugamak nang daan ngadto sa makapasagmuyo nga kaparotan batok sa Consolacion Sarok Weavers, 85-86 didto mismo sa ilang korte.
Kay tulo lamang sila ka teams sa ilang grupo, ang Mandaue nanginahanglan na lang karon nga mobawos sa Consolacion aron molugwa nga top seed sa 6th District nga maghatag kanila og P100,000 nga bonus paingon sa quarterfinal round.
Sa uban pang mga duwa, ang Alcoy Siloys ug Tuburan mitumba sa kanhi wa'y pilde nilang mga kaatbang.
Ang Alcoy mipakaging sa Argao, 86-76, samtang ang Tuburan mipayaka sa Balamban, 86-73.
Ang Alcoy mipuwersa og three-way tie uban sa Argao ug Samboan sa 2nd District standings sa managsamang 3-1 win-loss records, sama sa nahitabo sa Tuburan ug Balamban uban ang 2-1 nga baraha sa 3rd District. Ang Samboan mikadlit sa ikatulo nilang daog human gipiog ang Oslob, 86-82.
Sa laing resulta, ang Ginatilan mipilde sa Malabuyoc, 84-81 aron mapakgang ang duha ka sunod-sunod nilang pilde. Ang Malabuyoc natagak ngadto sa 1-2 uban ang Ginatilan sa 7th District Bracket B nga kasamtangang gidominar sa Alegria nga dunay 2-0 nga baraha.
- Latest