Dasmariñas handa nang harapin si Demecillo
MANILA, Philippines — Tuloy ang paghagilap sa susunod sa yapak ni Manny Pacquiao.
Kaya naman nakipagsanib-puwersa ang MP Promotions sa Singapore-based Ringstar Asia para itaguyod ang “Rising Stars” IBF eliminator bouts na naglalayong makatuklas ng bagong world-class boxers.
Maghaharap sa “Rising Stars” IBF eliminator sina IBO world champion Michael Dasmariñas at Kenny Demecillo bukas (Sabado) sa Resorts World Manila.
Nauna nang nakatakdang ganapin ang laban sa Singapore subalit nalipat ito sa Maynila para ipakita ang unang co-promotion event ng MP Promotions kasama ang Ringstar Asia.
“We’re all excited. It is a great opportunity to work with boxing legend Pacquiao in this promotion and build the next world champion in boxing,” ani Ringstar Asia founder Scott Patrick Farrell sa pagbisita nito sa 15th “Usapang Sports” ng Tabloids Organization in Philippine Sports (TOPS) sa National Press Club sa Intramuros, Manila.
Ayon kay Farrell, asahan ang matinding bakbakan sa pagitan nina Dasmariñas –ang tinaguriang “Gloves on Fire” -- at Demecillo na parehong nagnanais makahirit ng IBF world title.
Nasungkit ni Dasmariñas ang IBO crown sa bisa ng fourth-round knockout win kay Karim Guerfi ng Singapore noong April 2018 para mapaganda ang record nito sa 28-2-1 tampok ang 18 knockouts.
Hawak naman ni Demecillo ang 14-4-2 kasama ang walong knockouts.
Ang mananalo sa Dasmariñas-Demecillo fight ay mabibigyan ng tsansang makalaban sa isang world title bout.
- Latest
