MVP inaasikaso na ang 2023 World Cup hosting

MANILA, Philippines — Habang nakatutok ang lahat sa 2019 FIBA World Cup, nakipagpulong naman si SBP chairman emeritus at FIBA Central Board member Manny V. Pangilinan kay FIBA treasurer Ingo Weiss kamakalawa para sa pagiging lead host ng bansa sa pamamahala sa 2023 edition.

Nakausap din ni Pa­ngilinan si FIBA secretary-general Andreas Zagklis at iba pang FIBA officials.

“Andreas is a very warm person and a good friend,” wika ni Pangilinan.

Sinabi naman ni SBP president Al Panlilio na alam na ni Zagklis ang mga kailangan at isyu sa Philippine basketball.

Ayon kay Pangilinan, ihahayag ng SBP ang mga pinakabagong balita sa kanilang pakikipag-usap sa FIBA para sa pamamahala sa 2023 World Cup.

Dumalo siya sa draw sa Shenzhen Bay Sports Center noong Sabado.

Makakatuwang ng Pilipinas para sa hosting ng 2023 FIBA World Cup ang Indonesia at Japan, ngunit ang quarterfinals, semifinals at finals ay gagawin sa bansa kung saan posibleng itakda ang gold medal game sa 55,000-seat Phi­lippine Arena sa Bocaue, Bulacan.

Sa 2019 World Cup ay ibabalik ng FIBA ang classification stage na huling ipinatupad noong 2010 bago ibinasura noong 2014.

Sinabi ni Panlilio na dahil ang automatic Olympic slots ay ibibigay sa pitong bansa matapos ang World Cup, magiging krusyal para sa pagdetermina ng mga qualifiers ang classification stage.

Ang top African finisher, top two Americas finishers, top two European finishers, top Oceania finisher at top Asian finisher sa World Cup ay mabibigyan ng automatic entry sa 2020 Tokyo Games.

Bilang host, ang Japan ay mayroon nang guaranteed ticket. Ang top Asian finisher ay maaaring China o Iran o South Korea o Jordan o Pilipinas.

Isa naman sa Australia o New Zealand ang posibleng kumuha sa slot para sa Oceania.