Lakers mipakgang sa ilang demalas

CEBU, Philippines – Naputol ang lima ka sunod-sunod nga pilde sa  Los Angeles Lakers  human kini makabangon   gikan sa 30 puntos nga pagkalubong aron  luglogon ang Chicago Bulls, 123-107 sa NBA kagahapon didto sa United Center Arena sa Chicago, Illinois.

Si LeBron James miratsada og 36 puntos ug milangkat og 10 ka rebounds aron mangulo  sa nagpungasi nga opensa sa Lakers 

Grabe kaayo ang pagmangtas ni James, apil na niini ang pagposa niya og tres atubangan sa 7-footer nga sentro sa Bulls nga si Robin Lopez ug ingon man ang makalisang niyang reserve dunk nga nakapalabaw sa Lakers og 14 puntos, 115-101 sa katapusang singko minutos sa aksiyon.

Misalida sab si Kyle Kuzma nga miamot og 21 puntos sa iyang pagbalik human mapalta og duha ka duwa kay naangol ang iyang kiting. Dako sab og natabang si Kentavious Caldwell-Pope nga mikadlit og 24 puntos alang sa Lakers nga miluglog sa Bulls sa ikatulong kuwarter, 43-24.

Didto  sa   New Orleans, si Giannis Antetokounmpo miiskor og 24 alang sa Milwaukee Bucks nga mibugwak og 45 puntos sa ikatulong kuwarter dayon na ngadto sa pagtiklo sa Pelicans, 130-113.

Wala sab magpabitin si Ben Simmons nga mikulit og 26 puntos sa dihang gitipi sa Philadelphia 76ers ang Cleveland Cavaliers, 106-99.

Sa uban pang mga resulta, sila si DeMar DeRozan ug LaMarcus Aldridge nagkumboya og 61 puntos sa dihang gipaluhod sa San Antonio Spurs ang Dallas Mavericks, 112-105 alang sa ikaunom nilang sunod-sunod nga daog, si Bojan Bogdanovic dunay 24 puntos ug si Darren Collison milansang og duha ka krusyal nga free throws sa nahibiling 19.5 segundos aron aswaton ang Indiana Pacers ngadto sa 103-98 nga daog batok sa New York Knicks.