LeBron James ikaupat sa NBA career points, naapsan si Michael Jordan
CEBU, Philippines – Naapsan na ni LeBron James si Michael Jordan aron motikang sa ikaupat nga puwesto sa listahan sa NBA players nga dunay labing daghang puntos sa kasaysayan sa liga.
Wala hinuon makumpleto ang kalipay ni James gumikan kay ang Los Angeles Lakers misamot katakilid ug kuli na kaayo nga makasud sa playoffs human mapilde ngadto sa Denver Nuggets, 115-99.
Nakab-ot ni James ang maong dungog human gikumpleto ang iyang three-point play sa nahibilin nga 5:38 sa ikaduhang kuwarter.
Sa wala pa ang makasaysayanon niyang lay-up, gitabla ni James ang 32,292 career points sa Chicago Bulls legend sa pagtali sa nag-una niyang 12 puntos.
Atol sa sunod nilang time-out, si James milingkod sa ilang bench ug gitabonan ang iyang ulo og tuwalya nga daw sa naghilak samtang nanghinuklog nga iyang nalabwan ang gi-idolo niyang basketbolista gikan sa iyang pagkabata.
Sila si James ug Jordan kanunay nga itandi isip labing ngilngig nga players sa kasaysayan sa NBA.
Hinuon ang 34-anyos nga four-time MVP nakatigum sa maong gidaghanon sa puntos sud sa 1,190 ka duwa samtang narehistro kini ni Jordan sud lamang sa 1,072 ka duwa uban sa Bulls ug Washington Wizards.
Sunod puntariya ni James mao ang retiradong LA Lakers star guard nga si Kobe Bryant nga ikatulo sa NBA career scoring list uban ang 33,643 puntos.
Si Lakers legend Kareem Abdul-Jabbar mao gihapon ang nagkupot sa NBA points record uban ang 38,387 puntos ug gisundan kini ni Utah Jazz great Karl Malone nga dunay 36,928 points.
- Latest