Timberwolves hiniya ang Thunder

MINNEAPOLIS — Kumolekta si Karl-Anthony Towns ng 41 points at 14 rebounds para banderahan ang 131-120 panalo ng Minnesota Timberwolves laban sa Oklahoma City Thunder.

Umiskor ang All-Star center ng 16 markers sa third quarter at kinuha ng Timberwolves ang 14-point lead sa halftime para wakasan ang kanilang three-game losing skid.

Nagdagdag si Derrick Rose ng 19 points kasunod ang 18 markers ni Andrew Wiggins para sa Minnesota.

Kumamada naman si guard Russell Westbrook ng team-high 38 points mula sa kanyang 15-of-28 fieldgoal shooting sa panig ng Oklahoma City.

Sa Toronto, umiskor si James Harden ng 35 points at hinugot ni Gerald Green ang 11 sa kanyang 18 mar­kers sa fourth quarter para igiya ang Houston Rockets sa 107-95 paggupo sa Raptors.

Nag-ambag sina Eric Gordon at Austin Rivers ng tig-13 points para sa Rockets, dinuplika ang kanilang season high na anim na sunod na pananalasa.

Nagpasabog naman si Kawhi Leonard ng 26 points at kumolekta si Serge Ibaka ng 10 points at 15 rebounds para sa Raptors.

Natapos ang seven-game home winning streak ng Toronto, nakahugot kay Pascal Siakam ng 17 points.

Sa Indianapolis, tumipa si Bojan Bogdanovic ng 27 points habang may 22 markers ni Darren Collison para banderahan ang Indiana Pacers sa 105-96 panalo kontra sa Chicago Bulls.

Ito ang pang-limang sunod na pagpapatumba ng Pacers sa Bulls kasama ang apat ngayong season.