Lahat ng alas itataya ni Manny Pangilinan makalaro lang si Jordan Clarkson
MANILA, Philippines — Desidido si Samahang Basketbol ng Pilipinas chairman emeritus at FIBA Central Board member Manny V. Pangilinan na isulong ang pagsama kay Fil-Am NBA player Jordan Clarkson sa lineup ng Team Pilipinas sa 2019 FIBA World Cup na idaraos sa Agosto sa China.
Handa si Pangilinan na gawin ang lahat upang mapasama si Clarkson sa world meet kung saan kakausapin nito si FIBA secretary-general Andreas Zagklis para maayos ang problema sa NBA star.
Si Zagklis ang humawak sa mahigit 1,000 kaso sa Basketball Arbitral Tribunal at nagsilbi sa Court of Arbitration for Sport sa tatlong Olympics.
“Andreas texted me soon after the game against Kazakhstan and I was surprised, congratulating Gilas. We had a series of text exchanges. What I will do is to send a request to FIBA for you two (Blatche and Clarkson) to play together with Jordan to play as a local and you as a naturalized player. I think if both of you are there, then we will have a super team,” ani Pangilinan.
Ilalatag ni Pangilinan ang isyu sa FIBA World Cup draw na idaraos sa Shenzhen, China sa Marso 16.
Nais ni Pangilinan na maglaro si Clarkson bilang regular na miyembro ng Team Pilipinas at hindi naturalized player.
Nakapaglaro na ito sa 2018 Asian Games sa Jakarta, Indonesia bilang regular player dahil nagmamay-ari si Clarkson ng Philippine passport.
“One of the things that I would like to say to Andreas when I see him during the draw is to ask about Jordan’s status. This early, I will send him a letter stating that we would like to see Jordan play as a Filipino,” dagdag ni Pangilinan.
Sinisimulan na ni SBP president Al Panlilio ang pakikipag-usap sa PBA at Team Pilipinas coaching staff upang maayos ang training ng koponan.
- Latest