Dwyane Wade wa'y pagbahar

CEBU, Philippines — Bisan og talisaop na ang iyang karera, daw sa walay pagbahar ang abilidad ni Dwyane Wade human siya milansang og buzzer-beating 3-pointer aron giyahan ang Miami Heat nga makaipsot batok sa reigning NBA champion Golden State Warriors,   126-125 kagahapon  adlaw didto sa American Airlines Arena sa Miami, Florida.

Si Wade nga mipahibalo nang daan sa wala pa magsugod ang season nga moretiro na siya human niining kampanya, tataw nga misemento og maayo sa iyang legasiya sa mabulukon niyang karera sa madyik nga iyang nahimo nga nakaputol sa unom ka sagunson nga pilde sa Heat didto sa ilang korte.

Daw hapit pa mihawok ngadto sa kaparotan ang Heat sa dihang namugnaw human milabaw og 24 puntos. Salamat sa pagkamabayanihon ni Wade, nakalihay sila gikan sa lain untang kauwaw atubangan sa ilang fans.

Si Kevin Durant mibirada og maayo pinaagi sa pagposa og tres ug dayon pagpasud og duha ka free throws nga nakapalabaw sa Warriors, 122-118 sa nahibiling 67 segundos.

Apan nabuhi og balik sa Heat nga nakasikit sa iskor nga 121-122 human sa 3-pointer ni Wade sa nahibilin nga 15 segundos.

Human si Durant mipasud og usa ka free throw aron pagpalabaw sa Warriors og dos puntos, si Wade nakahimo og usa ka dakong milagro. 

Dihang natapalan ang una niyang itsa, yanong gipasud ni Wade ang ikaduha niyang tira gikan sa 3-point area dayong kapupos sa oras nga maoy nakapaulbo sa ilang fans ngadto sa usa ka mainit nga selebrasyon.  

"I've been in this position so many times and so many times you don't make the shot," matud pa ni Wade nga usa ka three-time NBA champion. 

Mismo si Warriors coach Steve Kerr ang misaludo ni Wade. 

Si Goran Dragic maoy nangu sa Heat uban ang 27 puntos, samtang si Josh Richardson miamot og 21 puntos.

Si Klay Thompson dunay 36 puntos sa Warriors, si Durant mi-iskor og 29  puntos ug si Stephen Curry mipupo og 24 puntos sa pilderong kawsa.

Sa laing duwa,si Houston star James Harden nakamaneho pagkadlit og 30 puntos sa dihang giukan sa Rockets ang Charlotte  Hornets, 118-113.