Hawks midagit sa Rockets

CEBU, Philippines – Nasipyat si James Harden sa tanan niyang 10 ka tres ug naputol sab ang 32 ka sagunson nga duwa diin siya miiskor og dili momenos 30 puntos.

Misamot pa kangiob ang  ngitngit nang daan niyang gabii human ang Houston Rockets gidagit sa Atlanta Hawks, 119-111 sa NBA kagahapon.

Si Harden mitapos uban ang 28 puntos human nakapalta sa ilang kadaogan batok sa Golden State Warriors gumikan kay na-injured ang iyang liog.

Duna pa unta siya'y tsansa nga inaton ang  init niyang ratsada sa pinuntosay kay siya man maoy nagkupot sa bola duol sa half court sa himalatyong oras nga nahibilin,  apan  wala  na siya mangahas pa nga padak-an ang iyang puntos.

Si Chris Paul dunay 20 puntos ug si Eric Gordon miposa og upat ka tres sa iyang 16 puntos sa pilderong Rockets.

Sa laing duwa, si Mike Conley mipupo og 30 puntos, apil na ang duha ka krusyal niyang free throws sa katapusang minuto sa aksiyon nga maoy naghatod sa Memphis Grizzlies ngadto sa 110-105 nga kadaogan batok sa Los Angeles Lakers.

Ang alas sa Lakers nga si LeBron James mipasud lamang og  walo  sa 23 niya ka tira, apan nakamaneho gihapon pagtali og "triple-double".

Taliwala sa ilang kaparotan nga nakapasamot sa kalbaryo sa Lakers, si LeBron duna gihapo'y angayan nga ikapasigarbo gumikan kay mikulit man siya og laing kasaysayan.

Si James nga mikolekta og 24 puntos, 12 ka rebounds ug 11 ka assists, nahimong labing unang player sa NBA nga naapil sa Top 10 sa all-time leader sa scoring ug assists. Ikalima sa all-time scoring, si James nakapasa na og 8,525 career assists aron labyan sa Andrew Miller sa ika-10 nga puwesto sa all-time assists.

Si Brandon Ingram mipabuhagay og 32 puntos ug si Kyle Kuzma miamot og 22 puntos, apan ang Lakers nasugamak sa ikaupat nga higayon sa miagi nilang lima ka duwa.