Knicks daog na gyud sa ilang korte
CEBU, Philippines — Si Damyean Dotson mikadlit og 27 puntos sa dihang gipakgang sa New York Knicks ang San Antonio Spurs, 123-118 aron putlon ang franchise-record nilang 18 ka sagunson nga pilde didto sa ilang korte.
Mipakita sab og nindot sa salida sila si Kevin Knox, Dennis Smith ug Emmanuel Mudiay nga mihipos og 19 puntos matag usa alang sa labing unang daog sa Knicks didto sa ilang homecourt sukad ilang gipakuratan ang Milwaukee Bucks niadtong Disyembre 1.
Gawas nga eksplosibo ang opensa, si Smith mipasa sab og 13 ka assists, samtang si Knox milangkat og 10 ka rebounds. Wala sab magpaalkansi ang rookie sa Knicks nga si Mitchell Robinson dihang mipugnit siya og 15 puntos ug milangkat og 14 ka rebounds.
Si DeMar DeRozan dunay 32 puntos ug siyam ka rebounds alang sa Spurs nga kaunom na napilde sa miagi nilang pito ka road games.
Sa laing duwa, si Terrence Ross mipatuasik og 28 puntos ug ang sentrong si Nikola Vucevic mikabkab og 23 puntos ug 12 ka assists sa Orlando Magic nga milubong sa kanhi niya team nga Toronto Raptors sa iskor nga 113-98.
Ang Raptors miinat sa ilang record ngadto sa 44-17 bisan og wala ang bitoon nilang si Kawhi Leonard nga tuyo gipapahuway sa ilang coach.
Didto sa Denver, Colorado, ang Denver Nuggets milubong sab sa Los Angeles Clippers, 123-96 luyo sa eksplosyon nilang Nikola Jokic ug Paul Millsap.
Si Jokic mihipos og 22 puntos ug 16 rebounds, sammtang si Millsap dunay 21 puntos ug 16 sab ka rebounds alang sa Nuggets nga milansang sa ikaupat nilang sagunson nga daog.
- Latest