Blaze Spikers tangka ang ika-2 dikit vs Lifesavers
MANILA, Philippines — Puntirya ng reigning champion Petron na makuha ang ikalawang sunod na panalo sa pagsagupa nito sa Generika-Ayala sa pagpapatuloy ng Philippine SuperLiga Grand Prix ngayong araw sa The Arena sa San Juan City.
Ipagpapatuloy ng Blaze Spikers ang mainit na ratsada nito kontra sa Lifesavers sa alas-7 ng gabi habang aarangkada rin ang bakbakan ng PLDT Home Fibr at Cignal sa alas-2 ng hapon at ang pukpukan ng F2 Logistics at Sta. Lucia sa alas-4:15.
Magarbo ang simula ng Petron nang pakainin ng alikabok ang PLDT sa pamamagitan ng 29-19, 25-9, 25-10 demolisyon.
Inilabas agad nina American imports Stephanie Niemer at Katherine Bell ang bangis nila para pamunuan ang magarbong simula ng Blaze Spikers.
Nagrehistro ng pinagsamang 29 puntos sina Niemer at Bell habang naglista si middle hitter Mika Reyes ng pitong puntos.
Sa kabila ng magandang panalo, may mga kailangan pang plantsahin ang Blaze Spikers upang magtuluy-tuloy ang magandang ratsada.
Isa sa mga tututukan ng Blaze Spikers ang receptions para makagawa ng mas solidong plays.
Sa kabilang banda, reresbak ang Generika-Ayala matapos lumasap ng 21-25, 25-22, 23-25, 25-16, 14-16 upset loss sa Sta. Lucia sa kanilang unang laro.
Posibleng hindi makalaro si Nikole del Rio na nagtamo ng injury sa naturang laro. Kaya naman kailangan ng local players na muling mag-step up upang tulungan si Kseniya Kocyigit.
- Latest
