Ex-CESAFI players molamas sa MSBC Season 5

CEBU, Philippines – Magtakus na sab ang pipila ka kanhi mga bitoon sa Cebu collegiate basketball  pinaagi sa Monday Squad Basketball-Cebu (MSBC) Season 5 nga sugdan karong Marso 4 diha sa Casals Village gym sa Barangay Mabolo, Dakbayan sa Sugbo.

Sa  dili  pa sugdan ang kumbati, dunay ipahigayon nga Draft Night karong Pebrero 25.

Ang defending champion Spartans ubos ni team captain Brad Luke 'Robocop' Dablos maoy mangu sa mga entranteng koponan.

Sila gihapon maoy labing lig-on nga puwersa gumikan sa presensiya sa kanhi mga varsity sa University of San Carlos (USC) Warriors nga sila si Ian Ortega, Prince Vaughn Malana ug Jax Bautista.

Makahatag hinuon kanila og lisud nga hagit ang Hard Court Kings, ang runner-up sa miaging season nga gitimonan nilang three-time MSBC regular season MVP Randy de la Pisa, kanhi SHS-Ateneo Magis Eagle Mark Anthony Ynoc, Larke Bacatan, Jared Nacasabog ug Matt Oche.

Molamas sa liga ang mga kanhi mga bitoon sa Cebu Schools Athletic Foundation, Inc. (CESAFI) nga mopakita'g aksiyon.

Apil na niini sila si Archie Bryan Batua, Garexx Puerto ug Kevin Quilantang sa University of Cebu (UC) Webmasters, JanJan Auditor sa Southwestern University (SWU)-Phinma Cobras, ug Michael Cantona sa USC Warriors.

Nagpadayon na karon ang registration. Kadtong intersado mosalmot gihatagan lamang kutob karong Pebrero 24 aron magparehsitro.

Alang sa dugang mga detalye, mahimong mokontak ni league commissioner James Cabilino sa 0906-4126709.