Generals tambak sa Tigers
MANILA, Philippines — Pinasuko ng University of Santo Tomas ang Batangas-Emilio Aguinaldo College, 94-70 para mainit na umpisahan ang kampanya nito sa 2019 PBA D-League kahapon sa Paco Arena sa Manila.
Pinuri ni Growling Tigers mentor Aldin Ayo ang matikas na inilaro ni Beninese forward Soulemane Chabi Yo na may double-double showing na 19 points at 11 rebounds kasama pa ang dalawang blocks.
Maganda rin ang simula ni Pangasinense forward Rhanz Abando na may 17 puntos, siyam na boards at dalawang dimes gayundin si Brent Paraiso na naglista naman ng walong puntos, anim na rebounds at limang assists para sa UST.
Nasilayan din sa unang pagkakataon bilang Growling Tiger ang 18-anyos guard na si Mark Nonoy na nagparamdam agad ng puwersa tangan ang 15 points, limang rebounds, dalawang assists at isang steal.
Si Nonoy ang pinakabatang manlalaro sa kasaysayan ng PBA D-League.
“Masaya kami kasi nakapaglaro agad ng maayos yung mga bago. Nakapag-adjust sila agad. Unang liga namin ito na big league. Masaya naman ako na hindi kami masyadong tight and nailabas nila yung laro nila. Yun lang naman, gusto lang namin na mailabas yung pineprepare namin,” aniya.
Nakakuha pa ang UST ng solidong suporta mula kay Renzo Subido na nag-ambag ng 11 puntos, limang assists at apat na rebounds para sa UST na umangat sa 1-0 marka.
Bumandera sa hanay ng Generals si Earvin Mendoza na may nakuhang 14 points, tatlong steals at dalawang rebounds.
- Latest
